Սեպտեմբեր ամսվա պարենամթերքի բաշխումն ավարտին է մոտենում՝ տրամադրելով ոչ միայն սնունդ, այլև հոգատարություն և շարունակական կապ մեր շահառուների հետ։ Օգոստոսը և սեպտեմբերը հատկապես ինտենսիվ ամիսներ էին՝ հագեցած տարբեր միջոցառումներով ու հանդիպումներով, որոնք կրկին անգամ ցույց տվեցին, թե որքան ուժեղ և կենսունակ է մեր համայնքը։
Այս ամիս պարենամթերքի բաշխման սկիզբը համընկավ մեր «Առողջ ապրելակերպ» հերթական դասընթացի հետ․ մասնակիցները ոչ միայն ձեռք բերեցին կարևոր գիտելիքներ, այլև ուրախությամբ և երախտագիտությամբ ստացան իրենց պարենամթերքի փաթեթները։ Նույն օրը մեր շահառուներից շատերը մասնակցեցին Հանգանակի խմբային պարապմունքների մասնակիցների գնահատման հարցմանը (Patient Satisfaction Survey for group activities), որը մեզ օգնում է գնահատել և շարունակաբար բարելավել մեր աշխատանքը։ Բացի այդ, նրանք, ովքեր դեռ չէին մասնակցել Արցախից բռնի տեղահանված միայնակ տարեցների առողջապահական, սոցիալ-հոգեբանական և կենցաղային կարիքների նախաքննական հարցմանը (Baseline Health, Psychosocial and Household Needs Survey), հնարավորություն ունեցան լրացնելու այն։ Այս հարցախույզը կարևոր մասն է մեր ընթացիկ դրամաշնորհային ծրագրի․ այն հանդիսանում է նախաքննական հարցախույզ, որի արդյունքները 6 ամիս անց կրկնակի հարցման միջոցով կօգնեն գնահատել ծրագրի ազդեցությունն ու արդյունավետությունը։
Այս հարցումները պարզապես տվյալներ չեն․ դրանք կենդանի հիշեցումներ են, որ Արցախցի տարեցների ձայնը պետք է լսվի, նրանց կարիքները պետք է ճանաչվեն, իսկ նրանց կյանքը՝ գնահատվի։ Մենք ամեն օր տեսնում ենք, թե ինչպես են շահառուները իրենց կարևոր ու ներառված զգում մեր ծրագրերում։ Նրանց պատրաստակամությունը՝ մասնակցելու Հանգանակի բոլոր նախաձեռնություններին, հաստատում է, որ մեր աշխատանքը միայն օգնության մասին չէ․ այն արժանապատվության, պատկանելիության և հույսի մասին է։
Պարենամթերքի բաշխումն արդեն ավարտվել է Երևանում և երեք մարզերում՝ Արարատում, Արմավիրում և Կոտայքում։ Շուտով կկիսվենք նաև մեր այցի մանրամասներով Լոռու մարզից։
Հետևեք մեր թարմացումներին և տեղեկացված եղեք Արցախից բռնի տեղահանված միայնակ տարեցների կյանքի մասին։ Ձեր աջակցությունը պարզապես օգնություն չէ․ այն կենսական կարեւոր քայլ է, որ բերում է սփոփանք, արժանապատվություն և հույս՝ փոխելով հարյուրավոր մարդկանց կյանքեր։