«Առողջ կենսակերպ» դասընթացների շարքի շրջանակում «Հանգանակ» ՀԿ-ն կազմակերպեց հերթական հանդիպումը, որն այս անգամ նվիրված էր օստեոխոնդրոզին․ թեման առաջարկվել էր հենց մեր շահառուների կողմից։
Դասընթացը վարեց «Հանգանակ» ՀԿ-ի բժիշկ Լիլյա Սեյրանյանը, որը ներկայացրեց օստեոխոնդրոզի առաջացման պատճառները, բուժման մոտեցումները և, ամենակարևորը՝ հիվանդության կանխարգելման ուղիները։ Մասնակիցները ոչ միայն ստացան կարևոր գիտելիքներ, այլև կատարեցին հատուկ վարժություններ՝ ողնաշարի առողջությունը պահպանելու նպատակով։ Վարժությունների հատվածը ավանդույթի համաձայն ղեկավարեց կինեզիոթերապևտ Անուշ Շեքյանը:
Կրթական և ֆիզիկական ակտիվության մասից հետո մասնակիցները միասին պատրաստեցին համեղ և օգտակար ուտեստ՝ թաբուլե, որն ընդգծեց առողջ սննդի դերը առողջ կենսակերպի պահպանման գործում։
Հանդիպման ավարտին մասնակիցները լրացրին հարցաթերթիկ, որի միջոցով մենք գնահատում և մշտապես բարելավում ենք մեր ծառայությունների որակը։
Այս դասընթացի միջոցով ևս «Հանգանակ»-ը շեշտեց կանխարգելման, ակտիվ մասնակցության և համայնքի ներգրավվածության կարևորությունը առողջության և բարեկեցության պահպանման գործում։
