Արցախում «Հանգանակ»-ի շահառուներին սոցիալական աջակցություն ցուցաբերելը ավելի դյուրին էր՝ շնորհիվ պետական կառույցների հետ սերտ համագործակցության։ Նրանց պատրաստակամությունը և հասանելիությունը ապահովում էին, որ ցանկացած հարց արագ և արդյունավետ լուծում ստանար։ Փոքր համայնք լինելով՝ Արցախում թե՛ պետական, և թե՛ հասարակական կազմակերպությունները կարողանում էին ժամանակին արձագանքել բնակչության կարիքներին։ Թոշակների, նպաստների, իրավաբանական, առողջապահական կամ ֆինանսական խնդիրները կարգավորվում էին արդյունավետ և լավագույն արդյունքներով։
Արտագաղթից հետո մեր շահառուները հայտնվեցին նոր սոցիալական միջավայրում, որտեղ խնդիրները դարձան ավելի բարդ։ Դրանք հաղթահարելու համար պահանջվում էր համառ և ինտենսիվ սոցիալական աշխատանք, որը, ցավոք, միշտ չէ որ ապահովում էր ցանկալի արդյունք։
Բարեբախտաբար, «Հանգանակ»-ը հնարավորություն ստացավ կիսելու նույն տարածքը «Աշխարհի բժիշկներ» (MDM) կազմակերպության հետ։ Սա դարձավ արժեքավոր համագործակցության սկիզբ նրանց սոցիալական մասնագիտական թիմի հետ՝ Սևակ Գալստյանի գլխավորությամբ։ Այդ համագործակցության շնորհիվ լուծվեցին մեր շահառուների բազմաթիվ խնդիրներ՝ կապված թոշակների, նպաստների, ժամանակավոր կացարանի, ինչպես նաև անվճար բժշկական օգնության և սպասարկման հետ։ Սակայն ամենակարևորը ոչ միայն այս արդյունքներն էին, այլև նոր բարեկամության ու երկարատև գործընկերության սկիզբը։
Մեր համագործակցությունը Սևակ Գալստյանի հետ շարունակվում է մինչ օրս։ Թեև նա այժմ ներգրավված է տարբեր սոցիալական ծրագրերում և նախագծերում՝ հանդես գալով որպես համակարգող և վերահսկող, այնուամենայնիվ շարունակում է անշահախնդիր աջակցել մեր շահառուներին՝ մասնագիտական խորհրդատվությամբ և ուղեկցությամբ։
Վերջերս մեր շահառուներից մեկը ավտովթարից հետո լուրջ առողջական և ֆինանսական ծանր իրավիճակում հայտնվեց։ Կրկին Սևակ Գալստյանի միջնորդությամբ և աջակցությամբ հնարավոր դարձավ նրան ընդգրկել «Փարոս» ծրագրում և ստանալ նաև պետական լրացուցիչ նպաստներ։
Մենք խորին շնորհակալություն ենք հայտնում Սևակ Գալստյանին՝ իր անկեղծ նվիրումի, մասնագիտական աջակցման և բարեկամության համար։ «Հանգանակ»-ը հպարտ է, որ ունի նման գործընկեր։