Հանգանակում իրականացվող հոգեբանական խմբային թերապիան շարունակում է ստեղծել ապահով և խրախուսող միջավայր մեր շահառուների համար՝ մտածելու, զրուցելու և հոգեբանորեն ամրապնդվելու նպատակով։ Վերջին հանդիպումն անցկացվեց ֆիլմի դիտման ձևաչափով, որին հաջորդեց բաց և անկեղծ քննարկում։
Ֆիլմը անդրադառնում էր ՄԻԱՎ դրական մոր հոգեբանական խնդիրներին և այդ իրողության ազդեցությանը ընտանեկան հարաբերությունների վրա։ Թեման ուղղակիորեն կապված չէր մեր շահառուների հիմնական խնդիրների հետ, սակայն այն ընտրվել էր մի կարևոր նպատակով՝ ցույց տալու համար, որ աշխարհում մարդիկ բախվում են ամենատարբեր դժվարությունների։ Ամենակարևորը ոչ թե խնդրի տեսակն է, այլ այն, թե ինչպես են մարդիկ կարողանում հաղթահարել այն՝ կամքի ուժի, փոխըմբռնման և կարեկցանքի միջոցով։
Մասնակիցները մեծ հետաքրքրությամբ դիտեցին ֆիլմը և ակտիվորեն կիսվեցին իրենց տպավորություններով։ Հետագա քննարկումը նպաստեց մասնակիցների մոտ կարեկցանքի զարգացմանը, մտածողության ընդլայնմանը և մարդկային տոկունության ու արժանապատվության կարեւորության ընկալմանը։
Հանդիպմանը մասնակցեցին նաև մեր կամավորները, ովքեր հանդիպման վերջում հյուրասիրեցին շահառուներին թեյ և սուրճ՝ ստեղծելով ջերմ, ընկերական և հոգատար մթնոլորտ։ Շահառուները հատկապես կարևորում են երիտասարդ սերնդի հետ շփումը՝ նշելով, որ այն ուրախություն, ջերմություն և նոր էներգիա է հաղորդում հանդիպումներին։
Հանգանակում մենք հավատում ենք, որ հոգեբանական աջակցությունը միայն անձնական ցավի մասին չէ։ Այն նաև օգնում է տեսնել աշխարհը ավելի լայն, զարգացնել կարեկցանքը ուրիշների նկատմամբ և հիշեցնել, որ մեզ միավորում են ընդհանուր մարդկային փորձառությունները։
