«Հանգանակ»-ի Տարեցների խնամքի ծրագիր․ Ծառայության, արժանապատվության և գոյատևման 21 տարի
2004 թվականի նոյեմբերի 29-ին «Հանգանակ»-ը մեկնարկեց իր Տարեցների խնամքի ծրագիրը՝ նախաձեռնություն, որը սկսվեց հստակ նպատակով՝ ապահովել արժանապատվություն, խնամք և հուսալի աջակցություն Արցախի ամենախոցելի խավին՝ տարեց մեծահասակներին։ Թեպետ ծրագրի պաշտոնական մեկնարկը նախատեսված էր դեկտեմբերի 1-ին, մեր թիմը սկսեց այդ օրը՝ երկուշաբթի, անմիջապես Հայ կանանց բարեկեցության միությունից /AWWA/ առաջին դրամաշնորհը ստանալուց հետո։ Այդ ժամանակին ստացված աջակցությունը մեզ հնարավորություն տվեց կատարել մեր առաջին քայլերը։
Մենք սկսեցինք պիլոտային ծրագրով՝ ուսումնասիրելով մեր տարեց շահառուների կարիքները, մշակելով եւ ձևավորելով խնամքի մի մոդել, որը հիմնված էր մարդկային ջերմության և մասնագիտական նվիրվածության վրա։
Փորձնական ծրագրի հաջողությունից հետո AWWA-ն շարունակեց սատարել, երբ մենք զարգացնում էինք ծրագիրը՝ այն վերածելով երկարաժամկետ նախաձեռնության, որը ապահովում էր ամենօրյա աջակցություն, տնային այցելություններ, սոցիալական ծառայություններ և տնային համալիր խնամք թույլ տարեցների համար։ Տարիների ընթացքում այս ծրագիրը դարձել է կենսական անհրաժեշտություն հարյուրավոր տարեց անձանց համար։
2023 թվականին Արցախի հարկադիր տեղահանումը դարձավ մեր պատմության ամենացավալի էջերից մեկը։ Բայց նույնիսկ արտագաղթի պայմաններում մենք շարունակեցինք մեր առաքելությունը՝ վերակազմավորվելով, վերականգնվելով և մնալով մեր տարեց շահառուների կողքին, ովքեր կորցրել էին իրենց տները, համայնքները և կենսական անհրաժեշտության ամենատարրական միջոցները։
Այսօր, երբ նշում ենք անընդմեջ աշխատանքի 21 տարիները՝ լի դժվարություններով, համառությամբ և մարդկային տոկունության անթիվ պատմություններով, մենք մեր խորին շնորհակալությունն ենք հայտնում AWWA-ին։ Նրանց վստահությունն ու անսասան աջակցությունը մեզ ուժ է տվել գոյատեւել պատերազմի, շրջափակման, տեղահանության և վերականգնման տառապալի տարիներին։ 21 ծանր տարիներ AWWA-ն եղել է ոչ միայն մեր հովանավորը, այլև մեր կայուն, անփոփոխ գործընկերը՝ արժանապատվության, խնամքի և հույսի ճանապարհին։
Այս նշանակալից օրը մենք հպարտությամբ շնորհավորում և մեր գնահատանքն ենք հաղորդում նաև «Հանգանակ»-ի նվիրված աշխատակազմին։ Ավելի քան երկու տասնամյակ՝ անասելի դժվարությունների և փորձությունների մեջ, նրանք ցուցաբերել են քաջություն, սիրո մեծ ուժ և անսահման նվիրում։ Նրանց աշխատանքն է պահել այս առաքելությունը կենդանի։ Նրանց ուժն է պաշտպանել մեր տարեցներին։ Նրանց մարդասիրությունն է եղել «Հանգանակ»-ի բաբախող սիրտը։
Այս տարեդարձը պատկանում է ոչ միայն մեր կազմակերպությանը, այլև մեր բոլոր աշխատակիցներին, ովքեր ծառայել են արժանապատվությամբ, կարեկցանքով և մեր առաքելության նկատմամբ անսասան հավատով։
