Հասկանալի պատճառներով երկարատեւ դադարից հետո, Հանգանակի բուժանձնակազմի խնդրանքով Տարեցների ծրագրի կլինիկական մասի պատասխանատու դր. Նենսի Բարսամյանը կազմակերպեց 2024 թվականի առաջին հանդիպումը Zoom հարթակում: Հանդիպմանը մասնակցում էր նաեւ դր. Արմինե Միրզաբեկյանը, որը առաջնային բուժօգնության օղակում աշխատում է որպես ընդհանուր պրակտիկայի բժիշկ եւ առանձնահատուկ մասնագիտացել է հիպերտոնիկ հիվանդության կառավարման ոլորտում: Նա նաեւ դասախոսում է Ումաս Չան բժշկական քոլեջի ուսանողներին:
Նենսի Բարսամյանի առաջարկով նախ Հանգանակի անձնակազմը ներկայացավ, յուրաքանչյուրը պատմելով իր մասնագիտության եւ աշխատանքային փորձի, մասնավորապես Հանգանակում կատարած իր աշխատանքի եւ դերի մասին:
Հակիրճ ներկայացնելով Հանգանակի գործունեությունը սկսած բռնի տեղահանումից մինեւ այսօր, Գոհար Հովհաննիսյանը խնդրեց բուժքույրերին ներկայացնեն իրենց կատարած աշխատանքը, շահառուների հետ կապված խնդիրները եւ այն խնդիրները, որոնք ծագում են իրենց գործունեության ընթացքում:
Ուշադիր լսելով բուժքույրերին, Նենսի Բարսամյանը բարձր գնահատեց նրանց կատարած աշխատանքը եւ հետաքրքրվեց այն հիմնական առողջական խնդիրներով, որոնք ավելի հաճախ են հանդիպում շահառուների մոտ: Առանձնահատուկ քննարկվեց հիպերտոնիկ հիվանդության հաճախականության եւ նրա կառավարման արդյունավետության հարցը: Խոսվեց նաեւ դիաբետիկ հիվանդների մասին, մասնավորապես 2 ինսուլինակախյալ հիվանդների մասին, որոնք դժվարանում են գտնել իրենց անհրաժեշտ ինսուլինը: Պարզվեց, որ պոլիկլինիկաները հիմնականում տրամադրում են հակադիաբետիկ դեղանյութեր, սակայն որոշ դեպքերում նրանք հասանելի չեն լինում հիվանդներին: Հանգանակը հնարավորինս փորձում է տրամադրել անհարժեշտ դեղանյութերը, սակայն վերջիններից ոչ բոլորը եւ ոչ միշտ են լինում առկա դեղատներում: Բացի դրանից, պետք է ունենալ գրասենյակ, որտեղ առկա լինեն անհրաժեշտ պայմաններ՝ դեղանյութերի պահպանման համար:
Քննարկվեցին նաեւ այլ հարցեր կապված շահառուների հոգեբանական խնդիրների եւ սոցիալական ակտիվության հետ: Որոշվեց, որ հաջորդ հանդիպումը կլինի նվիրված հիպերտոնիկ հիվանդության կառավարմանը եւ կքննարկվեն մի քանի կլինիկական դեպքեր: Դոկտոր Արմինե Միրզաբեկյանը սիրով խոստացավ միանալ այդ քննարկմանը եւս:
Միացեք մեզ եւ եղեք տեղեկացված Հանգանակի նորություններին: