Օգոստոսին Հանգանակը վերսկսեց պարենամթերքի տրամադրումը Երևանում և մարզերում բնակվող մեր տարեց շահառուներին: Ներկայումս բաշխումն արդեն մոտենում է ավարտին։ Այս աջակցությունը մեզ համար առանձնահատուկ նշանակություն ունի։ Ֆինանսավորման ներկայիս սահմանափակումների պատճառով այլևս հնարավորություն չունենք պարենային փաթեթներ տրամադրելու յուրաքանչյուր ամիս։ Սակայն, համադրելով առկա միջոցները և ներգրավելով լրացուցիչ ֆինանսավորում, որը Կոտայքի մարզում հոգում է ծրագրային որոշ ծախսեր, կարողացանք մեր սահմանափակ ռեսուրսների մի մասն ուղղել շահառուներին անհրաժեշտ հիմնական պարենամթերքի փաթեթի տրամադրմանը։
Մեր շահառուներից շատերի համար նույնիսկ համեստ պարենային փաթեթը զգալի աջակցություն է։ Արցախից բռնի տեղահանվելուց հետո ապրելով սահմանափակ եկամուտներով և շարունակելով նոր պայմաններում վերակառուցել իրենց կյանքը՝ մեր տարեցները ամենօրյա կարիքները հոգալիս հաճախ ստիպված են դժվար ընտրություն կատարել՝ գնահատելով առաջնահերթությունները։ Այս պայմաններում պարենային աջակցությունը շարունակում է մնալ Հանգանակի կարևոր հանձնառություններից մեկը՝ ուղղված նրանց առողջության, արժանապատվության և բարեկեցության պահպանմանը։
Օգոստոսյան աջակցությունը չէր սահմանափակվում միայն պարենամթերքով։ Առանձնահատուկ ուշադրություն դարձվեց շաքարային դիաբետ ունեցող շահառուների կարիքներին։ Տրամադրվեցին ինսուլինային ներարկիչներ և գլյուկոզայի չափման թեստ-երիզներ, իսկ այն շահառուներին, ովքեր չունեին համապատասխան սարք, տրամադրվեցին նաև գլյուկոմետրեր։ Այս առաջին հայացքից պարզ պարագաները չափազանց կարևոր են շաքարային դիաբետի վերահսկման և տնային պայմաններում առողջական վիճակի կանոնավոր հսկողության համար։
Ինչպես միշտ, պարենամթերքի տրամադրումը սերտորեն կապված է Հանգանակի առողջապահական և սոցիալական աջակցության մյուս ծառայությունների հետ։ Մեր թիմը այցելում է շահառուներին ինչպես Երևանում, այնպես էլ մարզերում, իսկ նրանք, ովքեր հնարավորություն ունեն և նախընտրում են, կարող են անձամբ այցելել Հանգանակի գրասենյակ։ Տնային այցելությունների ընթացքում մեր առողջապահական և սոցիալական աշխատողները ոչ միայն հասցնում են անհրաժեշտ աջակցությունը, այլև հետևում են յուրաքանչյուր շահառուի ինքնազգացողությանը, լսում նրանց մտահոգությունները և բացահայտում այն կարիքները, որոնք հետագա ուշադրություն կամ աջակցություն են պահանջում։
Հուլիսի 1-ից մեր աշխատանքի ևս մեկ կարևոր ուղղություն է դարձել շահառուների մասնակցության ձևակերպումը Հանգանակի ծրագրում։ Տնային այցելությունների և պարենամթերքի տրամադրման ընթացքում մեր թիմը շահառուներին ներկայացնում և նրանց հետ ստորագրում է Մասնակցության համաձայնագիրը։ Այն նպատակ ունի ձևավորելու ընդհանուր պատկերացում Հանգանակի կողմից մատուցվող ծառայությունների, ինչպես նաև կազմակերպության և յուրաքանչյուր մասնակցի իրավունքների ու պարտականությունների վերաբերյալ՝ առանձնահատուկ կարևորելով արժանապատվությունը, ներառականությունը և ակտիվ ու բովանդակալից մասնակցությունը։ Ներկայում համաձայնագրերն արդեն ստորագրվել են մեր շահառուների ավելի քան 95 տոկոսի հետ։
Կարևոր է ընդգծել, որ համաձայնագրի ստորագրումը պարզապես վարչական ընթացակարգ չէ։ Մասնակցությունը կամավոր է, իսկ շահառուները խրախուսվում են արտահայտել իրենց կարծիքը, առաջարկություններն ու դիտարկումները՝ օգնելով մեզ շարունակաբար բարելավել ծառայությունների որակը։ Համաձայնագիրը նաև հնարավորություն է տալիս ավելի լավ ճանաչելու յուրաքանչյուր մասնակցի հետաքրքրությունները, փորձը, գիտելիքները, հմտություններն ու կարողությունները և, անհրաժեշտության դեպքում, մշակելու Անհատական մասնակցության և ներգրավվածության պլան՝ նպաստելով համայնքային կյանքում բովանդակալից մասնակցությանը, կամավորությանը, ուսուցմանը և անձի ցանկություններին ու հնարավորություններին համապատասխան այլ գործունեությանը։
Այս ժամանակահատվածը ևս մեկ անգամ հիշեցրեց մեզ, որ իրական աջակցությունը միշտ չէ, որ չափվում է տրամադրված օգնության ծավալով։ Երբեմն ամենակարևորը յուրաքանչյուր հասանելի ռեսուրսը հնարավորինս նպատակային և արդյունավետ օգտագործելն է՝ ապահովելով, որ սահմանափակ միջոցներն ուղղվեն ամենահրատապ կարիքներին, անհրաժեշտ բժշկական պարագաները հասնեն դրանց կարիքն ունեցող մարդկանց, իսկ յուրաքանչյուր տարեց շարունակի զգալ, որ իրեն տեսնում են, լսում և հոգ են տանում իր մասին։
Չնայած սահմանափակ ռեսուրսներին՝ Հանգանակը շարունակում է հետևողականորեն, պատասխանատվությամբ և հոգատարությամբ կանգնել իր տարեց շահառուների կողքին։ Յուրաքանչյուր հասցված պարենային փաթեթ, յուրաքանչյուր լուծված առողջական կարիք, յուրաքանչյուր տնային այց և յուրաքանչյուր անկեղծ զրույց նույն հանձնառության մասն են՝ պահպանել մեր տարեցների արժանապատվությունը, նպաստել նրանց բարեկեցությանը և հիշեցնել, որ նրանք շարունակում են լինել մեր համայնքի կարևոր և արժեքավոր մասը։
