Հանգանակում շարունակվում է մեր «Առողջ ապրելակերպ» կրթական շարքը, և անցյալ շաբաթ տեղի ունեցավ հերթական կարևոր և ժամանակին ընտրված պարապմունքը, որը նվիրված էր ՄԻԱՎ/ՁԻԱՀ թեմային։ Թեման առաջացավ մեր շահառուների հետաքրքրությունից և հարցերից՝ հատկապես այն բանից հետո, երբ վերջին խմբային թերապիայի սեանսը անցկացվել էր ֆիլմի ցուցադրության ձևաչափով։ Ֆիլմը պատմում էր ՄԻԱՎ-դրական կնոջ և նրա ընտանիքի մասին՝ բացելով խորը զգացմունքային և մտածելու տեղիք տվող թեմաներ։
Պարապմունքը, ինչպես միշտ, վարեց բժիշկ Լիլիա Սեյրանյանը, ով հենց այս ֆիլմից հետո նկատեց, որ շատ մասնակիցներ ցանկանում են ավելի լավ հասկանալ հիվանդությունը, փոխանցման ուղիները և կանխարգելման հնարավորությունները։ Այդ պատճառով ընտրված թեման շատ արդիական էր և իսկապես հուզում էր մեր շահառուներին։
Պարապմունքի ընթացքում բժիշկ Սեյրանյանը պարզ, հասկանալի և հոգատար ձևով ներկայացրեց ՄԻԱՎ/ՁԻԱՀ-ի վերաբերյալ հիմնական տեղեկատվությունը։ Նա խոսեց հիվանդության փոխանցման ուղիների, կանխարգելման մեթոդների, անվտանգության կարևորության մասին, անդրադարձավ նաև տարածված սխալ պատկերացումներին և վախերին։ Քննարկումը անցավ բաց և վստահելի մթնոլորտում․ մասնակիցները ակտիվորեն հարցեր էին տալիս, կիսվում իրենց մտքերով և զգացմունքներով։
Հատուկ ջերմություն այս հանդիպմանը հաղորդեց նաև միասնականության մթնոլորտը։ Պարապմունքի ավարտին մեր երկու նվիրված կամավորները՝ Անուշ Կասյանը եւ Լուիզա Սարգսյանը, շահառուների համար պատրաստեցին թեյ և սուրճ՝ ստեղծելով ջերմ և մտերմիկ միջավայր։ Իսկ քաղցր սեղանը՝ քաղցրավենիքով, թխվածքաբլիթներով, հյութերով, արեւահամ չրերով և այլ հյուրասիրություններով, սիրով տրամադրել էր Մարտիկ Հիմնադրամը՝ ավելացնելով օրը փոքրիկ ուրախությամբ և հոգատարությամբ։
Այսպիսի հանդիպումները ևս մեկ անգամ հիշեցնում են մեզ, որ ուսուցումն առավել արդյունավետ է, երբ այն տեղի է ունենում վստահելի, բաց եւ փոխըմբռնման միջավայրում։ Հանգանակում մենք շարունակելու ենք ստեղծել ապահով մթնոլորտ, որտեղ մեր տարեց շահառուները կարող են սովորել, ազատ հարցեր տալ և զգալ ուշադրությունն ու խնամքը՝ ոչ միայն տեղեկատվական, այլև մարդկային փոխհարաբերությունների մակարդակում։
Սրտանց շնորհակալ ենք բոլոր մասնակիցներին, մեր կամավորներին՝ իրենց ջերմ աջակցության համար, և մեր գործընկերներին՝ այս կարևոր և իմաստալից հանդիպումը հնարավոր դարձնելու համար։
