Նոյեմբերի 29-ին Հանգանակը մասնակցել է Հայ Առաքելական Եկեղեցու՝ Սուրբ Թադևոս և Սուրբ Բարդուղիմեոս առաքյալների տոնին նվիրված հոգևոր ու մշակութային միջոցառմանը։ Էմպատիա հոգեկան առողջության կենտրոնը Հանգանակի շահառուներին ու անձնակազմին հրավիրել էր Աշտարակ՝ տրամադրելով նաեւ տրանսպորտ։
Օրը սկսվեց աղոթքով՝ Աշտարակի Սուրբ Մարիանե եկեղեցում, որտեղ մեր թիմը ստացավ հոգևոր մխիթարություն և ներշնչում։ Այնուհետև մասնակիցները հրավիրվեցին Աշտարակի Հայ Առաքելական Եկեղեցու հայորդանց տան համերգասրահ՝ ունկնդրելու «Արցախի Ծնունդներ» ազգային երգի համույթի ելույթը։ Համույթը ստեղծվել է 2014 թվականին Արցախում՝ Ստեփանակերտի մանկապատանեկան ստեղծագործական կենտրոնին կից։ Գեղարվեստական ղեկավար Անահիտ Գաբուզյանը տարհանումից հետո կարողացել է իր շուրջը հավաքել իր սաներին եւ նոր ուժով վերսկսել պարապմունքները տաղանդաշատ Արցախցի փոքրիկների հետ։ Համույթը իր բեմական ներկայությամբ և խորապես հուզիչ կատարումներով ստեղծեց մի մթնոլորտ, որտեղ յուրաքանչյուր ոք կրկին զգաց Արցախի շունչը։
Միջոցառման պաշտոնական նկարագրության մեջ ասվում է.
«Աշխարհասփյուռ հայության համար Սուրբ Թադևոս և Սուրբ Բարդուղիմեոս առաքյալների տոնը միշտ էլ ունեցել է հոգևոր ու միավորող ուժ… Այսպիսի նախաձեռնությունները ոչ միայն պահպանում են Արցախի հարուստ ժառանգությունը, այլև ուժ են տալիս մարդկանց՝ նոր վայրերում շարունակելու ապրել իրենց ինքնությամբ, երգով ու ավանդույթով… Արցախը ապրում է իր ժողովրդի արդյունքում՝ որտեղ էլ որ նրանք գտնվեն»։
Էմպատիա հոգեկան առողջության կենտրոնի և գործընկեր կազմակերպությունների նախաձեռնությամբ կազմակերպված այս միջոցառումը դարձավ ջերմ ու հիշարժան հնարավորություն մեր շահառուների համար՝ վերապրելու հայրենի հողի շունչը, լիցքավորվելու երաժշտությամբ ու համայնքի միասնականությամբ ու ամենակարևորը՝ զգալու, որ Արցախը շարունակվում է իրենց մեջ։
