Հոկտեմբերի 1-ին՝ Տարեցների միջազգային օրը, «Հանգանակ» բարեգործական ՀԿ-ն Երևանի և Հրազդանի իր շահառուների համար կազմակերպեց մի օր, որը դարձավ ոչ միայն տոնական միջոցառում, այլև ջերմ հանդիպում՝ լի անկեղծ զրույցներով, հարազատ հիշողություններով և միասին լինելու ուրախությամբ։
Առավոտյան մեր թիմը տրանսպորտ կազմակերպեց և Երևանից տարեց շահառուներին ուղեկցեց Հրազդան։ Շառլ Ազնավուրի անվան պուրակում նրանց արդեն սպասում էին Հրազդանի «Տեղահանված տարեցների համայնքահեն կենտրոնի» շահառուները՝ Արցախից բռնի տեղահանված և հյուրընկալող համայնքի տարեցները։
Երևանից և Հրազդանից ժամանած մասնակիցների հանդիպումն առաջին իսկ պահից լցվեց ջերմությամբ։ Ոմանք արդեն ճանաչում էին միմյանց, մյուսները հանդիպում էին առաջին անգամ, սակայն շատ արագ ձևավորվեց այն հարազատ ու վստահելի մթնոլորտը, որը միշտ առանձնահատուկ նշանակություն է ունեցել «Հանգանակ»-ի տարեցների ծրագրերում։
Բնության գրկում մեր շահառուների համար կազմակերպվել էր ջերմ հյուրասիրություն՝ ժենգյալով հաց, քաղցրավենիք, մրգեր, թեյ և սուրճ։ Սակայն այդ օրվա ամենամեծ արժեքը միայն հյուրասիրությունը չէր։ Ամենակարևորը միասին անցկացրած ժամանակն էր՝ հանգիստ նստելու, զրուցելու, միմյանց լսելու և կրկին համայնքի մի մասը զգալու հնարավորությունը։
Տարեցներն անկեղծանում էին, ասմունքում, պատմում իրենց կյանքի դրվագները և կիսվում Արցախում անցկացրած տարիների հիշողություններով։ Նրանց պատմություններում կրկին կենդանանում էին Շուշին, Գանձասարը, Ամարասը, Տիգրանակերտը և այն բազմաթիվ վայրերը, որտեղ «Հանգանակ»-ը տարիներ շարունակ կազմակերպում էր նմանատիպ հանդիպումներ, հյուրասիրություններ և ուխտագնացություններ իր շահառուների համար։
Այդ հիշողությունները միաժամանակ և՛ ջերմ էին, և՛ ցավոտ։ Դրանցում ապրում էին հայրենի բնության պատկերները, միասին անցկացրած տոնական օրերը, ճանապարհները, երգերն ու զրույցները։ Այս անգամ հանդիպումը տեղի էր ունենում Հրազդանում, բայց տարեցների պատմությունների ու հիշողությունների միջոցով Արցախը նույնպես ներկա էր՝ նրանց սրտերում, խոսքերում և միմյանց փոխանցվող ժպիտներում։
Մեզ համար հատկապես կարևոր էր տեսնել, թե ինչպես են Երևանի և Հրազդանի մասնակիցները մտերմանում, լսում միմյանց և կիսվում իրենց ապրումներով։ Այսպիսի հանդիպումները տարեցներին հնարավորություն են տալիս մի պահ հեռանալ առօրյա հոգսերից ու միայնությունից, զգալ իրենց արժևորված և շրջապատված հոգատարությամբ։
Օրն առավել հագեցած և հիշարժան դարձնելու համար Հրազդանից ճանապարհվեցինք դեպի Ծաղկաձոր։ Այստեղ մեր մասնակիցներն այցելեցին Կեչառիսի վանական համալիր, որտեղ խաղաղ ու հոգևոր միջավայրում ժամանակ անցկացրին, ապա եղան Օրբելի եղբայրների տուն-թանգարանում՝ ծանոթանալով նշանավոր հայ գիտնականների կյանքին ու գործունեությանը։
Մշակութային այցելությունները մեծ հետաքրքրություն առաջացրին տարեցների շրջանում։ Նրանց համար սա նոր բան տեսնելու և սովորելու հնարավորություն էր, բայց առավել կարևոր՝ տնից դուրս գալու, միասին ճանապարհորդելու և նոր ընդհանուր հիշողություններ ստեղծելու առիթ։
Տարեցների միջազգային օրը ևս մեկ անգամ հիշեցրեց, որ տարեց մարդուն անհրաժեշտ է ոչ միայն նյութական կամ բժշկական աջակցություն։ Նրան անհրաժեշտ է նաև շփում, ուշադրություն, լսված լինելու զգացում և վստահություն, որ իր փորձն ու կյանքի պատմությունը կարևոր են։
Մեր տարեցները մեզ հետ կիսեցին իրենց հիշողությունները, բանաստեղծություններ արտասանեցին, ժպտացին և վայելեցին բնության գրկում անցկացրած օրը։ Իսկ մենք ևս մեկ անգամ համոզվեցինք, որ երբ մարդկանց հնարավորություն է տրվում հանդիպելու, խոսելու և միասին ճանապարհ անցնելու, նույնիսկ ամենացավոտ հիշողությունների կողքին ծնվում են նոր ջերմ պահեր։
«Հանգանակ» բարեգործական ՀԿ-ն իր խորին երախտագիտությունն է հայտնում ՄԱԿ ՓԳՀ-ի հայաստանյան ներկայացուցչությանը, Եվրասիա համագործակցություն հիմնադրամին և Հայ կանանց բարեկեցության ընկերակցությանը՝ AWWA-ին։
Միջոցառումը հնարավոր դարձավ ՄԱԿ ՓԳՀ-ի ֆինանսական աջակցությամբ՝ ԵՀՀ-ի կողմից տրամադրված դրամաշնորհի շրջանակում իրականացվող Հրազդանի ծրագրի և AWWA-ի աջակցությամբ իրականացվող «Տարեցների ծրագրի» միջոցների համադրման շնորհիվ։
Մեր գործընկերների աջակցությունը հնարավորություն տվեց Երևանի և Հրազդանի տարեցներին միավորել մեկ ջերմ օրվա շուրջ՝ նրանց պարգևելով հոգատարություն, նոր տպավորություններ և ամենակարևորը՝ միասին լինելու զգացում։
Այդ օրը մենք ոչ միայն նշեցինք Տարեցների միջազգային օրը։ Մենք միասին անցանք հիշողությունների ճանապարհով՝ Արցախից դեպի Հրազդան ու Ծաղկաձոր՝ մեր սրտերում պահելով անցյալը և ստեղծելով նոր հիշողություններ։
